اسكربيت الحب

فتحت الكاميرا وظبطتها وبصوت واطي قربت من الشاشة وقولت
وحشتني
ظهرت صورته قدامي وهو بيبتسم شكله متغيرش يمكن طلع ليه دقن وشعره طول سيكا لكن لازال بنفس اللطف والحنية اللي على ملامحه
هترجع إمتى
فاضل 3 شهور وأرجعلك
وهتتجوزني!
يا سديم قولنا مليون مرة أنت أختي أتجوزك إزاي!
ضحكت وقولتله
أختك إزاي بقا أنت يا دوب واحد قريبي آه على العموم متقدملي عريس ومش عاوزه أقدم على أي خطوة غير بيك يا صديق طفولتي

ابتسم وقالي
قريب راجع لكن مفيش مانع تشوفي العريس ولو كويس أجلي كل حاجه لحد ما أرجع
حركت راسي بإبتسامة وقولتله
عندي محاضرة بكرة بدري هقفل وأكلمك تاني تمام
تمام يا سديم مع السلامة
قفلت اللاب وأنا بتنهد وفجأة عيوني دمعت حطيت أيدي على قلبي وزفرت جامد مسكت المخدة وبصيت للسقف دعيت دعوة كل يوم ربنا يجبر بخاطر قلبي
لما صحيت تاني يوم كان تفكيري كله هو ليه محاولش يحبني يجرب حتى!!
للأسف حبيته بوجوده جنبي الدايم ومعاملته معايا هو الصديق الوفي اللي عارفين كل حاجه عن بعض اللي حافظ طريقتي وأسلوبي عارف إني بحب القهوة والليل ولما بزعل بفضل إني اكون لوحدي لكن عمره ما سابني ولازم يكون معايا ويرخم عليا ويطلعني من المود
عارف إني أوقات بكون هادية وأوقات ببقا طايشة والمشكلة أنه حافظني بس دايما يقولي إحنا أخوات!!
مش هتقابلي عريس المرة دى يا سديم
وماله يا ماما وماله
لبست وأنا مدايقة وحاسة بحرارة في وشي من فكرة إني ممكن أكون لحد غيره
لما طلعت لقيت الكل قاعد يسلم عليا لكن العريس معبرنيش والحمدلله ولما قعدنا مع بعض حصل شئ مكنتش متوقعاه
إزيك
الحمدلله بخير
قبل ما ندخل في أي شئ هطلب منك طلب
أتفضل!
قالي وهو بيعدل نفسه
تعملي أي لو بتحبي حد وهو مش مهتم بيكي أو مثلا معتبرك صديق!
رفعت عيوني ليه وقولتله
أي بتقول أي!
أنا بعتذر ولكن أنا جاي من غير إرادتي أنا بحب زميلتي في الشغل ولكن هي مش بتبادلني نفس الشعور
فضلت مبلمه شوية وبعدين ضحكت
أنت شبهي كده ليه!
اليوم إنتهي على شئ غريب إتفاق خطوبة
آه إتفاق بيني وبين حسام العريس إني أساعده في أنه يخلي زميلته تحبه